Kryetari i partisë Bindja Demokratike, Astrit Patozi, ka bërë një koment ironizues në atë se çfarë pritet të ndodhë ndaj Bjellorusisë. Dhe gjithçka lidhet me stadiumin. Me një koment të shkurtër por mjaft të fortë, ai shprehet se shqetësimi më i madh për ndeshjen nesër me Bjellorusinë nuk lidhet me padiskutim për fitoren, por cilësia mizerabël e fushës në “Air Albania”, e cila nuk të lë të luash futboll.
Reagimi i Patozit
MOS U ANKONI KOT PËR FUSHËN E AIR ALBANIA
Shqetësimi më i madh për ndeshjen nesër me Bjellorusinë nuk qenka që na duhet patjetër fitorja, por cilësia mizerabël e fushës në Air Albania, e cila nuk të lë të luash futboll.
Nuk është për t’u çuditur shumë, në fakt. Se ajo punë, që kur e nisi kryetimonieri, nuk kishte për qëllim kryesor stadiumin, por godinat që do të ngriheshin gjoja në funksion të tij.
Ndaj mos u ankoni kot për barin dhe për topin që nuk pasohet, por kënaquni me hotelin, pallatet, dhe dyqanet, që i bëjnë hije fushës.
Trajneri i Kombëtares Edi Reja, ka thënë se stadiumi është i bukur, terreni ka pak vështirësi. Nisur nga ankesa e trajnerit, por edhe e lojtarëve, FSHF është vënë menjëherë në lëvizje duke hyrë në komunikim të drejtpërdrejtë me UEFA-n, në mënyrë që të ndryshohet agjenda e ndeshjes me Bjellorusinë.
Duke ditur se duhet patjetër fitorja për të kapur kreun e grupit, drejtuesit e federatës po mundohen që t’ia plotësojnë Kombëtares edhe dëshirën e fushës, në mënyrë që të mos ketë as alibi.
FSHF i ka bërë kërkesë UEFA-s për ndryshimin e stadiumit për ndeshjen e së mërkurës, nga “Air Albania” tek “Elbasan Arena”.
Vlen të theksohet fakti se stadiumi i ri kombëtar “Air Albania” u përurua para një viti, por në kuadrin e 12 muajve nuk u arrit asnjëherë që tapeti i fushës të jetë në kushte standarde.
