Gjykata e Apelit në Tiranë ka urdhëruar prokurorinë sot që të nisë hetimet ndaj deputetit të Partisë Socialiste, Ervin Bushatit, i cili është denoncuar nga PD që prej viti 2018, për të paktën 7 pasuri të deklaruara të cilat ai nuk i justifikon dot.
Kallëzimi i bërë nga PD, ka bërë që prokuroria e drejtuar nga Arta Marku të nisë hetimet ndaj deputetit Bushati, por pas njëfarë kohë ajo vendosi që ti mbyllë këto hetime, por sot Gjykata e Apelit ka urdhëruar prokurorinë që të nisë hetimet ndaj Ervin Bushatit.
“Ervin Bushati u bë deputet vetëm se i fali për 1 euro gruas së Edi Ramës tokën në Surrel dhe ka fshehur 7 pasuri mes të cilave 3600 m2 tokë truall”, tha Sekretari i Përgjithshëm i PD, Gazmend Bardhi asokohe.
Nga shqyrtimi i dokumentacionit zyrtar sipas PD rezulton se:
Nuk ka deklaruar pasuri me sipërfaqe 938 m2 në Tiranë, fituar më 21 prill 2017.
Po në Tiranë, nuk ka deklaruar një pasuri truall me sipërfaqe 600 m2, e fituar po në 21 prill 2017.
Në Tiranë Ervin Bushati nuk ka deklaruar as pasurinë me sipërfaqe 938 m2 truall, fituar më 25 korrik 2014.
Në Sarandë, deputeti i Edi Ramës nuk ka deklaruar pasuri me sipërfaqe 660 m2 truall, e fituar më 17 Korrik 2014.
Po në Sarandë, ka fshehur pronësinë e 1 nga 13 garazheve në pronësi të tij.
Deputeti i Ramës ka fshehur dy pasuri në Qerret të Kavajës, të fituara në të njëjtën ditë, 30 maj 2016; njëra pasuri truall 376 m2, tjetra ndërtesë me sipërfaqe 76 m2.
