Sekretari i Përgjithshëm i LSI-së, Endrit Braimllari, ka folur në lidhje me situatën e krijuar pas tërmetit të 26 nëntorit.
I ftuar në emisionin ‘7pa5’ në Vizion Plus, Braimllari akuzon kryeministrin Rama se duhet të kishte marrë masa që pas tërmetit të 21 shtatorit. Ai i bën thirrje prokurorisë që të hapë hetimet në lidhje me këtë ngjarje dhe të cojë para drejtësisë të gjithë fajtorët.
“Kjo situatë duhet të ishte menaxhuar me përgjegjshmëri, qeveria shqiptare duhet të kishte marrë masa që pas 21 shtatorit, nuk duhet të neglizhojmë institucionet e sigurisë kombëtare.
Situata në të cilën ndodhemi ka të bëjë me papërgjegjshmërinë e kryeministrit dhe kësaj qeverie. Tashmë ka një javë që ka kaluar dhe prokuroria duhet të nisë hetimet dhe të çojë para drejtësisë fajtorët, duke filluar nga institucionet përgjegjëse, Ministria e Mbrojtjes, kryeministri dhe të gjithë të tjerët.
Pas 21 shtatorit presidenti ka kërkuar që të merren masa por që qeveria i neglizhoi duke bërë që sot të kemi 51 viktima në vend. Unë nuk them se shmangen fatkeqësitë natyrore por mund t’i minimalizonin fatkeqësinë. Rama ka përgjegjësinë dhe nuk mund t’i shmanget përgjegjësisë, këtë fatkeqësi ai përpiqet ta kalojë me show. Nuk ka fuqizim të emergjencave civile nuk ka menaxhim, në terren ka vetëm propagandë”, tha ai.
