Kryebashkiaku i zgjedhur i Shkodrës, Valdrin Pjetri, lajmëroi dje dorëheqjen nga marrja e kësaj detyre, pas akuzave disaditore të artikuluara nga opozita për përfshirje të tij në trafik droge në vitin 2003 në Itali. Pjetri, i cili pritej të merrte detyrën e kreut të Bashkisë së Shkodrës më 19 gusht, në një postim në “Facebook” shpjegon për herë të parë se si është gjendur në ngjarjen, për të cilën akuzohet nga PD-ja.
“Një ngjarje krejt banale, e ndodhur mes shokëve të mi bashkëstudentë, në të cilën unë nuk kam asnjë faj e përgjegjësi e nuk i kisha kushtuar rëndësi, 17 vjet më parë në moshën 20-vjeçare, u nxor nga konteksti dhe rreth saj u ngritën akuza e linçime përtej çdo skrupulli moral e njerëzor”, shkruan Pjetri, ndërsa shton se akuzat e ditëve të fundit kanë shkaktuar shqetësime dhe dhimbje të mëdha tek ai dhe familja e tij.
Pjetri shprehet se pas largimit nga marrja e kësaj detyre, do të merret me zgjidhjen dhe sqarimin ligjor të kësaj ngjarjeje të 17 viteve më parë, ngjarje për të cilën në dijeninë e tij nuk ka pasur asnjë përgjegjësi ligjore në atë kohë.
Partia Demokratike akuzoi Valdrin Pjetrin se kishte fshehur në deklarimin e tij për pastërtinë e figurës një dënim të tij në Itali në vitin 2003, nën akuzën e trafikimit të lëndëve narkotike, vepër të cilën ai para drejtësisë italiane e kishte pranuar. Por Pjetri paraqiti para mediave dëshmitë e penalitetit të drejtësisë italiane, të cilat e tregojnë atë të pastër nga çdo dënim penal.
Ngërçi
Por si do të zgjidhet kryetari i ri i Bashkisë? Kjo mund të konsiderohet edhe pyetja që do të thellojë edhe më shumë ngërçin institucional të krijuar në vend. Nga një situatë e tensionuar politike ndërmjet maxhorancës dhe opozitës, topi në mënyrë të detyruar do të shkojë në fushën e Presidentit Meta. Jo sepse ai kërkon të bëhet protagonist, por se Kushtetuta dhe ligji ia ngarkon këtë detyrë.
Konkretisht, neni 10 i Kodit Zgjedhor dhe neni 115 i Kushtetutës thekson se në rast të ndërprerjes së mandatit të të zgjedhurit vendor, Presidenti i Republikës cakton dekretin për zhvillim e zgjedhjeve të parakohshme jo më vonë se 48 orë nga marrja e vendimit.
Përplasja
A do ta dekretojë Presidenti Meta një datë të re zgjedhjesh për Bashkinë e Shkodrës? Përgjigja e kësaj pyetjeje mund të jepet vetëm nga Presidenti Meta. Përgjigje e cila do të përcaktojë një thellim të krizës institucionale apo një qetësim të ujërave ndërmjet tij dhe maxhorancës.
Kreu i shtetit, në fillim të muajit qershor firmosi një dekret për anulimin e zgjedhjeve të datës 30 qershor. Ky dekret i tij u atakua në mënyrë indirekte në Kolegjin Zgjedhor, institucion ky që e rrëzoi këtë vendim të Presidentit dy herë.
Herën e parë njohu 30 qershorin si ditë zgjedhjesh dhe herën e dytë duke certifikuar mandatet e këshillave bashkiak në të 61 bashkitë e vendit. Por Presidenti nuk e njohu këtë vendim me argumentin se vetëm Gjykata Kushtetuese mund të shprehet mbi dekretet e tij. Ky institucion nuk mund të flasë, sepse prej rreth një viti nuk ekziston, përshkak se anëtarët i ngelën në testin e vetingut.
Presidenti nga ana e tij vijoi më tej duke caktua datë 13 tetor për zhvillimin e zgjedhjeve vendore në të gjithë vendin. Ky dekret i dytë i tij nuk u pranua nga maxhoranca. Kësisoj, nëse Meta do të caktoj një datë të dytë për Shkodrën, mund të duket si shenjë paqeje ndërmjet tij dhe Ramës.
Nëse kreu i shtetit rishprehet se 30 qershori ka qenë ditë për votimet socialiste, dhe se nuk njeh Valdrin Pjetrin si të zgjedhur, atëherë Shkodra mund të mbetet pa drejtues deri në krijimin e Gjykatës Kushtetuese për zgjidhjen e mosmarrëveshjeve politike./Panorama
