Ferit Keta do të ngjitet sërish në ring për të vijuar rrugën drejt ngritjes në nivelet më të larta të boksit europian. Luftëtari kuqezi do të përballet të shtunën, në orën 21:00, me një rival mjaft të vështirë, argjentinasin Emilion Ezeqiuel Zarate.
Për hir të së vërtetës, kjo sfidë ishte programuar për Gjetanin, por gjendja jo e mirë shëndetësore e 35 vjeçarit e detyroi trajnerin Ismail Keta të ndryshonte në momentet e fundit dhe në ring do të zbresë Feriti.
Ky superduel do të zhvillohet në “Pabellon Ciudad Deportiva” në qytetin spanjoll të Moralzarzal. Zarate ka një rekord për t’u respektuar, ku në 45 ndeshja si profesionist ka regjistruar 21 fitore, 12 prej të cilave me “knock-out”. Ndërkohë, Ferit Keta, i cili nuk e ka ndërprerë stërvitjen, vjen në këtë përballje pas triumfit në “kick-box” ndaj turkut Fetih Mehmet Karakus, aty ku siguroi edhe titullin e kampionit të botës, ndërsa në boksin profesionist 30-vjeçari ka një rekord të përsosur prej 11 fitoresh në 11 ndeshje, 8 prej të cilave me “knock-out”.
Nuk do të jetë një duel i thjeshtë, por djaloshi nga Bulqiza është edhe një herë i gatshëm të bëj krenar të gjithë mbështetësit kuqezi.
