Tërmetet e vazhdueshme kanë krijuar një situatë emergjente në vend, ku shumë njerëz kanë mbetur pa strehë.
Shumë njerëz kanë mbetur jashtë për shkak të dëmeve të mëdha që banesat e tyre kanë marrë. Ndërsa të tjerë kanë akoma frikë të kthehen nëpër banesa, pasi nuk përjashtohen mundësitë për lëkundje të tjera.
Aktivistët e “Fundjavë Ndryshe” vijojnë punën e tyre me shpërndarjen e ndihmave për familjet në nevojë. Pas ndihmave të shpërndara në zonën e Thumanës, ato kanë arritur edhe në Durrës.
“Fundjavë Ndryshe” ka nisur shpërndarjen e ndihmave dhe ushqimeve, për banorët që kanë braktisur shtëpitë dhe pallatet e shembura për t’u strehuar në çadra.
Ata janë kujdesur që banorët në nevojë të furnizohen me veshmbathje, dyshekë dhe ushqimet më të nevojshme
“Me radhë po shpërndahen ushqimet. Është shkarkuar kamioni i parë. Siç duket këtu është një situatë kaotike. Këtu ka njerëz që kanë nevojë për të ngrënë. Presim që të vijnë edhe ndihmat e tjera nga Tirana. Kemi shkarkuar dy makina, kemi edhe kamionët me dyshekë”, thotë themeluesi i këtij fondacioni, Arbër Hajdari.
Tërmeti prej 6.4 ballësh që goditi vendin mëngjesin e sotëm shënoi një tragjedi të vërtetë. Deri më tani raportohen të jenë shënuar 19 viktima. Epiqendra e tërmetit ishte 10 kilometra larg nga Durrësi dhe 31 kilometra larg nga Tirana.
Situata u paraqit më kritike në Thumanë e Durrës, ku janë numëruar edhe shumë godina të shembura.
