Skënderbeu konfirmohet edhe njëherë si ekipi më i fortë në Superiore edhe me mungesa të rëndësishme. Korçarët mposhtin Partizanin në “Selman Stërmasi” me një gol të shënuar në sekondat e fundit nga Bruno Dita. Fakt është që në këtë vit futbollistik “Të Kuqtë” nuk arritën të mposhtin në asnjë nga katër sfidat Skënderbeun duke mbajtur vetëm një barazim dhe tre humbje.
Ishte një ndeshje që vlente më shumë për vendasit sesa për vizitorët pasi Partizani luan për një vend në Europë sezonin e ardhshëm ndërsa Skënderbeu ka një avantazh të kënaqshëm nga vendi i dytë. Dhe ishin vendasit ata që luajtën më mirë, sidomos në pjesën e parë të takimit, duke provuar disa herë për të zhbllokuar rezultatin por pa sukses.
Ishte Abdurahimi ai që shënoi në minutën e 25’ por arbitri Koci anuloi golin për një faull të sulmuesit. Partizani vazhdoi të ishte superior edhe pas pushimit të ndeshjes por pa arritur të gjejë golin e fitores. Në disa momente të ndeshjes kishte edhe ndalesa për shkak se tifozët e irrituar të Demave të Kuq kanë hedhur flakadanë në fushë duke i shoqëruar me ofendime ndaj arbitrit dhe Federatës Shqiptare.
Teksa dukej sikur ndeshja do të përfundonte me barazim pa gola, në fund të takimit ishte Bruno Dita ai që lëshon një goditje të hidhët nga distanca duke mundur portierin Hoxha.
