Gjatë protestës së mbrëmshme në Beograd, për shkak të paralajmërimit të rikthimit të orës policore, janë plagosur 43 policë. Mediat në Serbi bëjnë me dije se mbi 1000 qytetarë u mblodhën në qendër të Beogradit, pasi presidenti i Serbisë, Aleksandar Vuçiç, paralajmëroi rikthimin e orës policore në fundjavë, për shkak të rritjes së numrit të rasteve me koronavirus.
Përleshjet shpërthyen pasi një grup protestuesish, u përpoq të hyjë në ndërtesën e Kuvendit të Serbisë, duke bërë që policia të hidhte gaz lotsjellës për të shpërndarë turmën.
Ministri i Brendshëm i Serbisë, Nebojsa Stefanoviç, tha se 43 policë u plagosën gjatë protestës së mbrëmshme. Duke qëndruar në të njëjtën linjë, ai u shpreh se sulmet ndaj oficerëve të policisë janë të papranueshme dhe nuk do të tolerohen.
Turma pranë hapësirës së Kuvendit u shpërnda rreth orës 1:30 pas mesnate. Vuçiç tha të martën (7 korrik) se nisur nga sot, tubimet do të kufizohen në pesë njerëz dhe se do të kërkojë nga grupi punues i qeverisë kundër koronavirusit, që të shpallë orë policore në fundjavë.
“Duhet t’i mbrojmë qytetarët, kështu që nuk më interesojnë reagimet politike dhe protestat”, tha Vuçiç.
