Duke marrë shkas nga situata e përkeqësuar me pandeminë në vend, presidenti Meta i ka shkruar një letër ministres Manastirliu, kryeministrit Rama e kryetarit të Kuvendit Gramoz Ruci, për një informacion të detajuar.
Kreu i shtetit thotë se duhet bërë një rivlerësim tërësor i situatës, dhe masave të mara në raport me të.
Sipas parashikimeve që njofton Meta, situata e pandemisë pritet të përkeqësohet, drejt një katastrofe, që duhet parandaluar në kohë.
Dje u regjistrua numri më i lartë i viktimave në vendin tonë në 24 orë. 7 qytetarë kanë humbur jetën, ndërsa janë regjistruar 284 raste të reja.
Aktualisht në spitalin Infektiv dhe “Shefqet Ndroqi” po trajtohen 285 pacientë, 15 në terapi intensive nga të cilët 9 pacientë janë të intubuar.
Statusi
Nisur nga përkeqësimi i dukshëm i situatës së pandemisë COVID-19, me shtim të numrin të personave të infektuar, e fatkeqësisht me rritje edhe të numrit të qytetarëve të cilën kanë humbur jetën, shtrohet si domosdoshmëri një rivlerësim tërësor i situatës dhe masave të marra në raport me të, duke konsideruar edhe afrimin e stinës së ftohtë, si një tjetër faktor rëndues.
Me përshkallëzimin e krizës së rëndë politike e institucionale, veçanërisht pas shkeljes brutale e të njëanshme të Marrëveshjes konsensuale të 5 Qershorit, situata e pandemisë pritet të përkeqësohet drejt një katastrofe, që duhet parandaluar në kohë.
Në këto kushte, po bëj publike letrën zyrtare që i kam dërguar ministres së Shëndetësisë, për dijeni Kryeministrit ende në detyrë dhe Kryetarit të Kuvendit.
