Gjatë raportimit të tij të përjavshëm përpara gazetarëve, presidenti Meta u shpreh se është i gatshëm që të mbledhë Këshillin e Sigurisë për çështjen e koronavirusit, nëse kjo do të jetë e nevojshme. Ai zbuloi se do të zhvillojë një takim me Ministren e Shëndetësisë, Ogerta Manastirliu, për të diskutuar mbi gjendjen e shkaktuar nga pandemia e COVID-19.
Kreu i Shtetit apeloi ndaj qytetarëve që të tregohen të kujdesshëm dhe të përgjegjshëm për zbatimin e masave anti-COVID. Ai vuri në dukje se ka një shkujdesje nga ana e qytetarëve, ndërsa kërkoi më shumë transparencë dhe profesionalizëm për mbrojtjen e mjekëve.
“Ju e dini që janë zhvilluar disa mbledhje dhe padyshim që në të ardhmen do të zhvillohen. Unë kam kërkuar një takim zyrtar me Ministren e Shëndetësisë në mënyrë që të gjykojmë mbështetjen që mund të japë presidenti në këtë rast. Por dhe qytetarët duhet të tregohen më të kujdesshëm dhe të përgjegjshëm për shëndetin e tij dhe familjarëve. Duket që ka një shkujdesje, nuk na ndihmon që të hapemi as me BE, do të jetë e nevojshme një mbledhje e tillë. Ndërkohë duhet dhe më shumë transparencë dhe profesionalizëm për mbrojtjen e mjekëve dhe personelit shëndetësor”.
