Nga Anxhela Ferra
Në këto ditë të nxehta, kur temperaturat janë duke kapur vlerat maksimale, shumë e gjejnë “shpëtimin” në plazh apo pishina. Edhe pse kryesisht javët që shqiptarët marrin pushimet janë në mesin e muajit korrik e gusht; në vitet e fundit numri sa vjen edhe pakësohet. Pasi pjesa më e madhe e tyre nuk kanë mundësi të bëjnë pushime. Kjo gjë është vërtetuar nga një anketë e bërë prej Komisionit Europian mbi Cilësinë e Jetës. Sipas tyre 81% e shqiptarëve nuk kanë mundësi të bëjnë as një javë pushime larg shtëpisë së tyre.
“Nuk kam planifikuar pushime për këtë vit, sepse nuk ka lekë. Ndoshta do shkojmë ndonjë të diel, më tepër për fëmijët. Por, një apo më shumë javë nuk kemi dot mundësi. Do të shkojmë sa më afër të mundemi, në mënyrë që të kemi sa më pak shpenzime. Më parë ka qenë më ndryshe, ekonomia ishte më e lartë. Tani nuk kemi hiç, asnjë 5 mijë lekësh.”
“Nga mezi i gushtit mendojmë të nisim pushimet. Ne punojmë në Greqi dhe pushimet vijmë që t’i bëjmë këtu. Sepse familja është këtu, detyrimisht që këtu do pushojmë. Plus edhe kosto me e ulët. Dihet që është kënaqësi t’i bësh pushimet jashtë, por nëse nuk ke lekë dhe andej është e vështirë. Kurse të vijmë këtu me lekët që bëjmë andej, është diçka më ndryshe.”
“Këtu në Shqipëri do të pushojmë, pasi nuk kemi mundësi ekonomike. Nëse do të kisha mundësi do kisha qejf të shkoja në Greqi. Pasi kam qenë atje dhe më pëlqen më shumë.”
“Në krahasim me Shqipërinë, Greqia është më e shtrenjtë. Prandaj dhe ne vijmë nga andej familjarisht, me qëllim se edhe çmimet janë më të lira.”
Por, edhe pse në krahasim me shtetet fqinje çmimet në Shqipëri janë më të lira, sërish jugu mbetet i shtrenjtë. Mirëpo, shumë preferojnë të shpenzojnë për pushime në vend, sesa të lëvizin jashtë, ku i duhet të harxhojnë më tepër. Ndryshe mendojnë të tjerë qytetarë, të cilët thonë për Tirana Today se shërbimi në Shqipëri lë shumë për të dëshiruar, ndaj zgjedhin gjithmonë destinacione të tjera.
“Mundësitë ekonomike nuk i kemi të gjithë, prandaj të punojmë sa më shumë. Në mënyrë që të bëjmë pushime. Unë mendoj t’i bëj pushimet në Shqipëri, ndaj do të zgjedh Vlorën. Sigurisht që në Shqipëri janë të shtrenjta, sidomos ajo pjesa e Jugut. Por, edhe nëse do të shkojmë jashtë, shkon më shtrenjtë. Prandaj opsioni më i mirë mbetet Shqipëria.”
“Do të shkoj jashtë vendit, sepse nuk bëj pushime këtu në Shqipëri. Sepse nuk ka as kushte, as njerëz, asnjë gjë. Madje edhe janë më të shtrenjta këtu sesa jashtë. Ndaj kam menduar të shkoj ose në Greqi, ose në Kroaci.”
Për disa të tjerë të udhëtojnë për pushime jashtë vendit është një luks papërballueshëm. Qytetarët për herë e më tepër kërkojnë të largohen nga vendi, me qëllim gjetjen e një pune në shtetet europiane.
“Ku kemi pushime ne, ne lëvizim për të gjetur punë. Pushime për ne as nuk ka pasur dhe as nuk do të ketë ndonjëherë. Është një gjendje shumë e dobët, punë nuk ka, drejtim jo. Shkuam tani të aplikojmë për të ikur për në Gjermani. I thamë nëse doni na e siguroni mundësinë pa lekë, se ne nuk kemi asnjë qindarkë. Ishalla të ikin të gjithë, të qërohen që këtu. Asnjë mos të mbetet këtu, bosh le të mbetet Shqipëria. Dhe le të rrijë ai i gjati dhe të zgjatet akoma më shumë.”/ TIRANA TODAY
