Pas zgjedhjeve të 30 qershorit, opozita i rikthehet të hënën protestave, në ditën kur Kuvendi do diskutojë ngritjen e një komisioni hetimor për shkarkimin e presidentit Ilir Meta. Duke mos njohur zgjedhjet, Lulzim Basha u ka kërkuar kryebashkiakëve të tij të mos lëshojnë zyrat e tyre më 10 gusht.
Protesta do të nisë në kryeministri, dhe do të përfundojë me gjasë para parlamentit. Klima është e acaruar, dhe pas qetësimit të imponuar të situatës më 30 qershor, mund të ketë rifillim të përplasjeve mes policisë dhe protestuesve.
Por situata këtë herë është e ndryshme. Meta dhe Basha, po sulmojnë hapur ndërkombëtarët për qëndrimin e tyre ndaj qeverisë aktuale dhe zgjedhjeve lokale. Presidenti po vë në dyshim reformën në drejtësi, të mbështetur dhe garantuar prej tyre.
Si në çdo rast, ambasadat do u bëjnë thirrje palëve të ruajnë qetësinë, dhe t’i shmangen dhunës. Por nuk dihet se sa do të dëgjohen nga protestuesit, që priren të ndjekin verbërisht udhëheqësit e tyre politikë.
Me injorimin e 2 dekreteve të tij në qershor, jo vetëm nga PS por edhe ndërkombëtarët, Meta është ndjerë i anashkaluar dhe madje i delegjitimuar si kreu i shtetit. Tani ai synon të delegjitimojë diplomatët e huaj në Tiranë, në mënyrë që fjala e tyre të peshojë më pak në veshët e shqiptarëve. E gjitha kjo synon që “krismat” e krizës shqiptare, të dëgjohen nga zyrtarët e nivelit më të lartë në Perëndim, të cilët mund të detyrohen të ndërmjetësojnë mes palëve.
Deri tani kemi parë që ndërkombëtarët, u janë imponuar gjithmonë politikanëve shqiptarë. Meta me shumë sesa Basha, beson se këtë herë do të ndodhë e kundërta. Gjasat janë të pakta, por le të presim se çfarë do të ndodhë…/ TIRANA TODAY
