Pas debatesh, PD-ja ka marrë sot vendimin përfundimtar se nuk do të ketë bojkot të Kuvendit të Shqipërisë. Vendimi u mor në mbledhjen e sotme të grupit parlamentar të PD-së, që nisi punimet në orën 12:00.
“Hapi i vetëm që na mbetet është bojkoti. Ne duhet të shkëputemi nga ky Parlament. Ramës ia dhamë kohën e duhur për Xhafën”, mësohet të ketë thënë Flamur Noka.
“Qytetarët na kërkojnë të mos jemi në Parlament, sepse aty bëhet teatër”, ka thënë Klevis Balliu.
Edhe deputeti tjetër demokrat Bardh Spahija, është shprehur pro bojkotit, si hapi i fundit që i ka ngelur opozitës. “Shqipëria nuk mund të bëjë përpara me dy ministra të Brendshëm të lidhur me drogën. Ka ardhur koha që të marrim seriozisht në konsideratë opsionin e bojkotit të Parlamentit”, tha ai.
Kështu edhe grupi parlamentar i LSI ka marrë vendim të bojkotojë parlamentin pas datës 28 qershor, pasi të jetë dhënë vendimi nga BE-ja për çeljen ose jo të negociatave me Shqipërinë.
Deri më 28 qershor, LSI-ja ka vendosur të marrë pjesë në komisionet parlamentare.
LSI i është bashkuar kështu, qëndrimit të PD-së, e cila ka vendosur marrëdhënie të kushtëzuara me parlamentin dhe do të vazhdojë protestat në komisione deri më 28 qershor.
