Oerd Bylykbashi, përfaqësues i PD-së në tryezën e përbashkët të reformës zgjedhore ka komentuar kompromisin e arritur ndërmjet palëve. Sipas tij, dokumenti i publikuar sot është një garanci që palët po bashkëpunojnë me njëri-tjetrin dhe se procesi nuk do të jetë i kontestuar.
”Ky dokument garanton që reforma zgjedhore të bëhet me konsensus dhe kjo gjithëpërfshirje e konsensus të shkojë deri në fund. Kemi asistencën ndërkombëtare. Pas kaq kohësh nga kërkesa jonë, për të arritur këtë do të institucionalizohet një forum, Këshilli Politik, që do të mandatojë punën për të kryer gjithë këtë reformë”- tha Bylykbashi.
Ndërsa, nënkryetari i LSI-së Petrit Vasili është shprehur se me këtë takim dhe me kompromisin e arritur vendi është një hap drejt rrugës së integrimit. Sipas tij, opozita nuk imponon palën tjetër.
“Është një hap në një moment të rëndësishëm për plotësimin e një kushti të Bundestagut. Pra një kush edhe për integrimin evropian. E shëndosh një proces që është kaq shumë i sëmurë. Do të kemi ekspertizën ndërkombëtare që adreson çështjet që janë bërë shkak i shkatërrimit të besimit tek qytetarët”, tha Vasili.
