Sot Kuvendi zhvillon seancën e radhës plenare, ndërkohë që opozita nuk ka zhvilluar protestë përpara Parlamentit për herë të parë pas 9 javësh. Zona përballë Kuvendit ka qenë e qetë, ndonëse policia ka marrë masat e sigurisë si në çdo seancë plenare duke bllokuar kalimin në zonën e pedonales, zonë në të cilën janë vendosur edhe forca të shumta policie, në rast të ndonjë organizimi të papritur.
Në mbledhjen e përbashkët mes Kryesisë së PD dhe grupit parlamentar të PD, Lulzim Basha propozoi marrjen e 3 vendimeve të rëndësishme, të cilat u miratuan nga Kryesia. Kryetari Basha kërkon që PD të regjistrohet për në zgjedhjet e ardhshme lokale, por me kushtin që të jetë krijuar terreni për zgjedhje të lira dhe të ndershme.
Nga ana tjetër, Edi Rama tha nga foltorja e Kuvendit se maxhoranca është gati të dialogojë me opozitën. Ai foli për dy PD, si atë rrugore, sipas tij, dhe atë parlamentare, por duke shtuar se ai është i gatshëm të ulet dhe të bisedojë me ta. “Jemi gati të bëjmë bashkëpunimet e duhura. Jemi gati të pranojmë të komunikojmë edhe me ata që janë të dhënë pas kapsollave. Jemi gati në komisionin e reformës zgjedhore, kanë vendin e tyre si vëzhgues me status special. Nuk kemi çfarë bëjmë. Kemi një PD parlamentare dhe një Parti Demokratike rrugore. S’kemi ça bëjmë”, u shpreh Rama.
