Ministri i Brendshëm, Sandër Lleshaj, ka reaguar në lidhje me operacionin e fundit të Policisë së Shtetit, ku bënë të mundur arrestimin e një prej kriminelëve më të rrezikshëm në vend. Lleshaj nënvizon se finalizimi i këtij operacioni, dëshmon qartë nivelin e integritetit dhe profesionalizimit të policisë.
Dalin pamjet/ Si u arrestua anëtari i ‘Llanajve’ në sallën e bilardove
“Policia e Shtetit arrestoi sot në Selenicë një ndër kriminelët më të rrezikshëm në vend, një vrasës të shumëfishtë, të arratisur nga burgu në Itali dhe të dyshuar edhe për vepra të tjera të rënda.
Finalizimi i suksesshëm i këtij operacioni provon qartazi nivelin e integritetit dhe profesionalizmit të Policisë së Shtetit, e cila po e rrit përditë forcën e saj goditëse ndaj krimit.
Por kjo është vetëm NJË goditje e radhës në serinë e pandalshme që vijon.
Vullneti politik për luftën kundër krimit, është i paepur.
Policia e Shtetit është plotësisht e motivuar dhe mbështetja e bashkëpunimi i qytetarëve për të, në funksion të një Shqipërie me të drejtë dhe më të sigurtë, është në rritje të vazhdueshme.
Vlora duhet të ndihet sot edhe më e qetë dhe më e sigurtë, ndërsa Policia e Shtetit më krenare për operacionin e planifikuar dhe finalizuar me mjeshtëri profesionale.
Përgëzime dhe respekt për të gjithë ata pjesëtarë të PSH që kontribuuan në këtë sukses.
Ndërkohë, operacioni vazhdon”, shkruan ai në Facebook.
Autoritetet policore arrestuan këtë të mërkurë në Selenicë të Vlorës Tesi Bashon, i dënuar nga Gjykata e Torinos për vrasje të dyfishtë. 38-vjeçari u arratis nga burgu italian në vitin 2016.
Basho është dënuar në Itali me burgim të përjetshëm për vrasjen e dy prostitutave, shfrytëzim prostitucioni dhe mbajtje të armëve luftarake.
