37 persona janë arrestuar në Itali dhe Shqipëri gjatë një operacioni të madh të Departamentit të Antimafias Italiane dhe autoriteteve shqiptare, të cilat ishin koordinuar me një skuadër të përbashkët investigative.
Të arrestuarit akuzohen për trafik ndërkombëtar droge, ndërsa autoritetet kanë sekuestruar 3.5 ton drogë e tipit marijuanë, hashash e kokainë, vlera e së cilës është 40 milion euro.
Operacioni është kryer në bashkëpunim me autoritetet shqiptare, me CriminalPol, me zyrën ndërlidhëse të Interforze në Tiranë e me koordinimin e Eurojust.
Gjatë hetimeve janë sekuestruar 3 ton e gjysmë drogë e tipit marijuanë, hashash e kokainë e vlefshme për të përgatitur 7 milionë doza drogë me vlerë 40 milion euro.
Në orët e para të mëngjesit të sotëm po realizohet edhe urdhri i sekuestrimit të pasurive të të arrestuarve me vlerë deri në 4 milion euro.
Raportohet se në orën 12 të paradites së sotme do të mbahet një konferencë e përbashkët shtypi.
Në konferencë do të marrë pjesë Kreu i Antimafias e i Antiterrorizmit Italian Federico Calfiero De Raho, Prokurori Special i Antikorrupsionit e Krimit të Organizuar shqiptar Arben Kraja, Nënkryetari i Eurojust Filippo Spezia, prokurori i Barit Giuseppe Volpe, kreu i Antimafias së Barit Francesco Giannella, si edhe Drejtori i Antimafias Italiane Gjeneral Giuseppe Governale.
