Presidenti Hashim Thaçi, shprehet se situata nga koronavirusi është shumë shqetësuese në Kosovë.
Përmes një postimi në Facebook, Thaçi i bën thirrje qytetarëve që të respektojnë masat në mënyrë rigoroze.
“Ju bëj thirrje që t’i zbatoni në mënyrë rigoroze masat për parandalimin e përhapjes së virusit COVID-19 dhe t’i respektoni rekomandimet e institucioneve shëndetësore. Duke i zbatuar masat dhe rekomandimet e institucioneve shëndetësore secili qytetar ruan veten, të afërmit e tij dhe gjithë shoqërinë”, shkruan ai.
Thaçi i ka shprehur mirënjohjen stafit shëndetësor dhe u ka shprehur ngushëllime familjarëve të viktimave nga koronavirusi.
Shërbimi Spitalor dhe Klinik Universitar i Kosovës, ka njoftuar të shtunën se në spitalet publike në Kosovë janë të shtrirë 301 pacientë të konfirmuar me COVID-19 pozitiv.
Nga këta, 22 janë në gjendje të rënduar me përkujdesje intensive. Deri më tani në Kosovë janë regjistruar 4.512 raste dhe 97 viktima.
