Nga Anxhela Ferra
Për të marr ndihmën e parë në Shqipëri, në dispozicion janë katër numra të emergjencës. Për shërbimin e policisë është 129-ta, për zjarrfikësen është 128-ta, për ambulancën telefonohet në numrin 127-të dhe 126-ta policia rrugore. Ndërkohë prej vitit 2016-të të gjithë numrat e shërbimit të emergjencës janë unifikuar në një të vetëm. Mjafton të telefonojmë 112-ën, e cila më pas lidhet me shërbimin e nevojshëm. Por, sa i njohin shqiptarët dhe të rinjtë numrat e emergjencës?
Nëpërmjet një vox pop-i të bërë nga Tirana Today pjesa më e madhe e tyre nuk dinë këtë të telefonojnë në rast nevojë për ndihmë të parë.
“Jo, nuk e dimë se cilët janë numrat e emergjencës. Madje as nuk më intereson t’i di.”
“Numrat janë 129, 127, 112. Kur marrim policinë telefonojmë në numrin 129, për ambulancën telefonojmë 112. Mjafton që dimë një ose dy.”
“128 më duket se është policia, ndërsa për ambulancën duhet të telefonojmë 112-ën në mos gaboj. Por, gjithsesi njëra do të dalë.”
Edhe pse dhënia e ndihmës së parë është diçka jetike, duket se shqiptarët nuk dinë as cilët nga numrat të marrin në telefon. Por, sipas të rinjve, kjo vjen edhe nga mungesa e edukimit. Po ashtu fajësojnë institucionet si shkollat. Ku sipas tyre nuk janë të afishuara. Dhe kjo gjë ka sjellë edhe mungesë informacioni për këto shërbime.
“Si numra i di, por nuk e di me siguri se cili nga numrat i përkon shërbimit të caktuar. 129-ta është ose policia ose ambulanca. Njëra do të jetë, por nuk e di cila. Ndërsa kur marrim 112-ën, nuk e di se cili shërbim emergjence është. Në shkolla nuk janë të afishuara numrat e emergjencës. Ka thjesht oraret për departamentet, por numrat nuk kam parë.”
“As nuk e di fare, nuk merrem me emergjencën.”
“Është 112-ta për të gjithë, kaq di. Të them të drejtën numrat i kam të shënuara në telefon sepse nuk i mbaj mend. Jam shumë e sigurt që po t’i pyesësh gjithë shqiptarët, 911-ën e dinë. Ndërsa numrat tanë nuk i dinë. Por, duhet t’i mësojmë sepse nuk do të marrim 911-ën dhe t’i themi hajde në Shqipëri.”/ TIRANA TODAY
