Deputeti i Partisë Demokristiane, Nard Ndoka nuk do të jetë deputet në legjislaturën e ardhsme të Kuvendit.
I renditur i 8-ti në listën e koalicionit ”Aleanca për Ndryshim”, Ndoka nuk arriti ta thyejë herësin, pasi Partia Demokratike siguroi 5 mandate në qarkun e Shkodrës.
I ftuar në emisionin ”Top Talk”, Ndoka fajësoi kryedemokratin Lulzim Basha, pasi sipas tij koalicioni nuk ishte funksional.
Ndër të tjera, Ndoka tha se gaboi duke i besuar verbërisht Bashës të ardhmen e forcës politike që ai drejton, teksa shtoi se do të dorëhiqet.
Nard Ndoka: ”Unë e konsideroj mision të mbyllur, pasi i besova verbërisht Bashës. Edhe nëse opozita do të ishte fituese, prapë do ta bëja. Në shtator-tetor do mblidhet kongresi dhe do të zgjidhet kryetari i ri. I besova të ardhmen e PDK-së Bashës dhe kjo është e pafalshme për mua. Faji është imi, sepse i besova verbërisht Lulzim Bashës.
Unë jam përpjekur në mënyrë maksimale të bëj fushatë për opozitën. Por, ka pasur dhe një problem. Koalicioni nuk ka qenë funksional. Basha u foksusua më tepër te kompania që e këshillonte se sa të takohej te aleatët.”
