Koronavirusi i ka marrë jetën një tjetër mjeku në Shqipëri. Fatkeqësisht ka ndërrruar jetë si pasojë e COVID 19 mjeku Bledi Nini, 48 vjeç.
Ai ka humbur jetën në Itali ku ishte dërguar për kurim, ndërsa nuk ia ka dalë dot mbanë me virusin vdekjeprurës. I ndjeri shërbente si mjek ORL në QSUT.
Lajmin e ka bërë të ditur miku i tij, njëherësh edhe kreu i Bashkisë së Vlorës, Dritan Leli, i cili thotë se marrja e këtij lajmi nuk ishte i thjeshtë.
“U nisa për në ‘Shkollën Tregtare’ me të njëjtin optimizëm me të cilin kam dashur të përcjell mesazhet sensibilizuese nëpër shkolla, gjatë këtyre ditëve, por lajmi se miku e kolegu im, një nga mjekët më të talentuar vlonjat, Bledi Nini, e humbi këtë mëngjes betejën me Covidin, nuk është i thjeshtë për mua. Virusi nuk është lojë mediatike, kujdesuni për veten, përdorni maska dhe tregohuni të vëmendshëm ndaj të gjitha masave parandaluese! Pushofsh ne paqe, Bled!”.
Situata me pandeminë po rëndohet çdo ditë e më shumë në vendin tonë, ndërsa spitalet janë të tejmbushur me pacientë që janë në vështirësi për jetën.
