Kryetarja e Bashkisë Shkodër, Voltana Ademi, ka rndarë me qytetarët përjetimet pas infektimit me koronavirus. Në një intervistë për ‘Report Tv’, Voltana ka treguar se ka qenë një situatë e vështirë sidomos 8 ditët e para. Edhe ajo ka përjetuar simptomat e shtuara si temperaturë, kollë, lodhje, djersitje dhe vështirësi në frymëmarrje, ndërsa pohon se ka qenë një periudhë aspak e lehtë.
“Besoj se do jem në fazën e fundit drejt shërimit të plotë. Ka qenë e vështirë, është sëmundje e pakuptueshme si sëmundje, në një moment ndihesh mirë dhe më pas ke simptoma të shtuara si temperaturë, kolla, lodhja, djersitja dhe vështirësi në frymëmarrje. Jam përpjekur ta menaxhoj, kam një periudhë jo të lehtë. Ka qenë një situatë e vështirë sidomos 8 ditët e para, por tani jam më mirë. Pak e lodhur, por do kalojë”, tha Ademi.
Kryebashkiakja e Shkodrës ka pasur kritika për sistemin shëndetësor, që nuk ka një protokoll të qartë të ndjekjes së pacientëve. Ajo thotë se çdo pacient duhet të ketë mjekun që i jep informacionin, dhe e ndjek kurimin e tij. Po kështu Voltana ka ngritur një tjetër shqetësim, pasi shteti nuk jep asnjë asistencë për familjet që kanë të prekur, pasi kurimi është i shtrenjtë.
“Sistemi ka shumë probleme në adresimin e COVID-19. Sistemi i kujdesit të mjekut të familjes dhe shërbimit parësor nuk ekziston në përballimin e koronavirusit. Një i prekur nuk ndiqet në bazë të një protokolli, pjesa që lidhet me mjekimin, kontrollet, analizat e gjakut, pra ka një protokoll. Çdo pacient duhet të ketë mjekun që i jep informacionin dhe e ndjek kurimin e tij. Pjesa e mjekimit kushton shumë për COVID-19. Shteti nuk jep asnjë asistencë për këto familje që kanë të prekur, pasi kurimi është i shtrenjtë. Shërbimi shëndetësor nuk është mbështetur fare dhe kjo është e rëndë për një familje”, tha Ademi.
