Dërgimi i 30 mjekëve dhe infermierëve shqiptarë në Itali, duket të ketë bërë jehonë të madhe në vendin fqinj. Zyrtarë të shumtë në politikë dhe figura të tjera të njohura kanë vlerësuar gjestin e Shqipërisë dhe kanë shprehur falënderimet e tyre.
Mirëpo edhe pse kanë kaluar dy ditë, jehona e këtij akti duket se nuk është shuar akoma. Ditën e sotme ka reaguar edhe ish-kryeministri italian, Silvio Berlusconi. Përmes një postimi në Instagram, Berlusconi shpreh falënderimet e tij ndaj Shqipërisë, teksa e cilëson atë si një komb të vogël por me tradita të mëdha dhe civilizim antik.
“Unë e njoh kryeministrin e Shqipërisë, Edi Ramën dhe e kam vlerësuar shumë gjestin e tij dhe fjalët e tij fisnike kundrejt Italisë. Shqipëria është një komb i vogël, por është një vend me tradita të mëdha dhe civilizim antik, me të cilin vendi ynë ka një marrëdhënie historike që qeveritë e mia kanë bërë gjithçka për ta konsoliduar”, shkruan Berlusconi në postimin e tij.
Italia është shteti më i prekur nga koronavirusi në botë, duke numëruar më shumë se 11 mijë viktima.
https://www.instagram.com/p/B-ZHqZ8qXjL/?utm_source=ig_web_copy_link
