Një incident ndodhi sot në takimin e “Open Balkan”, ku u thye një gotë uji. E menjëhershme ishte batuta e kryeministrit Rama.
“U thye një gotë. Në traditën tonë, syri i keq sa mori një goditje, pa mundur të marrë veten”, tha ai, ndërsa vijoi më tej “Më duhet t’ia kaloj fjalën një miku të madh. I them mik i madh, se ka bërë gjithçka që BE të ishte e pranishme, duke ndihmuar njerëzit tanë me vaksinat. Po kështu, ai ka qenë shumë në ndihmë në përcaktimet e korridoreve dhe zonave të gjelbra. Oliver, jeni miku më i mirë i neve në Bruksel”.
“Open Balkan”, Varhelyi: Uroj t’i bashkohen shpejt edhe tre vendet e tjera
Komisioneri i Zgjerimit në BE, Oliver Varhelyi tha se mbështet nismën e “Open Balkan”. “Kam qenë gjithmonë i prirur pozitivisht ndaj këtij propozimi. Së pari u quajt Minishengen, e më pas u përpoqëm me Procesin e Berlinit, por për fat të keq kjo nismë u la mënjanë dhe ndërkohë e konsideroj “Ballkanin e Hapur” një pasardhëse apo një zëvendëse deri sa të gjithë të jenë rreth tryezës. Ju duhet të vazhdoni ta nxisni këtë nismë, sepse rajoni kërkon të jetë një i tërë sa i takon ekonomisë, shoqërisë dhe rajoni kërkon të jetë bashkë, siç jemi ne në BE.
Admiroj faktin se sa fort e ndjeni këtë nismë, ka qenë nismë që vjen nga Ballkani. Ju kuptuat rëndësinë e integrimit rajonal, dhe kjo është në gjendje të ndryshojë jetën e qytetarëve tuaj. Ky është mesazhi më i mirë që rajoni mund të përçojë, që jo vetëm është gati për bashkëpunim rajonal, por po e bën. Mund të më përfshini si mbështetës të “Ballkanit të Hapur”. Ne mendojmë që në bazë të rregullave të BE-së, çdo bashkëpunim rajonal jo vetëm është i mirëpritur, por është në të mirë të të dyja palëve. Do të ishte ideale të gjendej një mënyrë për t’u kthyer në tregun e përbashkët rajonal. Ftoj tre vendet e tjera t’i bashkohen kësaj nisme, mund të ndryshojë realitete në terren që janë shumë të zymta dhe vetëm përmes bërjes konkrete të tregut të përbashkët rajonal, Ballkani mund të shtojë 1/3e PBB ekzistuese. Dhe kjo është shumë afër vetëm duke zbatuar tregun e përbashkët rajonal. Unë uroj që t’i bashkohen sa më shpejt edhe tre vendet e tjera”, tha ai.
