Ish-zëvendësministrja e Brendshme, Rovena Voda, ka ankimuar vendimin e Shkallës së Parë që e la atë në masën e sigurisë “Arrest shtëpie” nën akuzën e “Ushtrimit të ndikimit të paligjshëm”.
Voda kërkon që të hiqet masa e sigurisë, me argumentin se nuk ka asnjë rrezik për të prishur provat apo për t’u larguar. Nga hetimet dhe përgjimet e SPAK rezultoi se Rovena Voda kishte marrë një mijë euro, një telefon dhe një arkë me peshk nga Florida Beu dhe Majlinda Hasani, duke u premtuar në këmbim një vend pune në shtet.
Përgjimet e bisedave telefonike të Florida Beut u kryen nga policia, sepse vëllai i saj, Emirjon Beu ishte përfshirë në hetimet për ish-Prokurorin e Kukësit, Edmond Karriqi. Nga bisedat, policia zbuloi ryshfetin që Florida Beu përgatitej t’i paguante ish-Zv/Ministres së Brendshme, Rovena Voda, në këmbim të një vendi pune në administratë.
Një mijë euro në zarf, një celular Samsung, (sepse ish-Zv/Ministrja nuk preferonte iPhone) dhe një arkë me peshk të freskët, sipas dosjes së SPAK, u dhanë ryshfet. Të treja gratë u takuan dhe sipas prokurorëve, ish-Zv/Ministres iu dha zarfi me një mijë euro, të cilat Florida Beu i kishte marrë borxh. Më pas, ajo dhe Majlinda Hasani e komentojnë takimin në telefon.
Po kështu, policia ka mundur të filmojë edhe momentin kur Voda shkon me Beun dhe Hasanin në portin e Durrësit për të marrë arkën me peshk, me makinën e punës e cila drejtohej nga shoferi i saj.
