Ish-presidenti Bujar Nishani ka reaguar pas deklaratës së kreut të PD-së, Lulzim Basha, për ish-kryeministrin Sali Berisha. Basha tha se ai arriti ta fitonte Bashkinë e Tiranës në 2011, pasi “përjashtoi” nga fushata Sali Berishën. Sipas Bashës, çelësi i fitores ishte vendimi për të përjashtuar Sali Berishën nga fushata për Bashkinë e Tiranës. “Unë jam i pari dhe i vetmi kandidat që e kam mundur Edi Ramën. Nuk e kam thënë. Çelësi i fitores ka qenë vendimi për të përjashtuar Sali Berishën nga fushata”, tha Basha. Përkundër qëndrimit publik të Bashës, Bujar Nishani e përgënjeshtron. Me anë të një postimi në rrjetet sociale, Nishani kujton kohën se si Basha i kërkonte Berishës, që ta udhëzonte edhe në gjërat më elementare.
Statusi
Të nderuar miq, një gënjeshtar kongjenital jo vetëm që nuk mund të na udhëheq në ndonjë fitore por na shkaktoi në tetë vite, kaosin, hallakatjen dhe dekurajimin më të madh politik që kemi patur ndonjëherë brenda Partisë Demokratike.
Gënjeshtari kongjenital po thotë se ka fituar në 2011, Bashkinë e Tiranës, pa Berishën!
Si drejtues i shtabit elektoral për Tiranën, atë botë, më bezdiste deri në nervozizëm tek shikoja se si gjatë gjithë ditës, L. Basha i kërkonte S. Berishës ta udhëzonte, ti tregonte e ti mësonte edhe detajet më elementare për axhendën ditore dhe tezat e fushatës.
Ky nuk është thjesht qesharak, jo vetëm gënjeshtar kongjenital por një parazit politik me një kosto të madhe për të gjithë ne.
11 Dhjetori 2021, po vjen me shpejtësi.
Uragani i njerëzve të ndershëm, trimave e patriotëve do të shpëtojë Partinë Demokratike.
Të ringremë PD për të shpëtuar Shqipërinë!
