Rritja e shtrimeve në spitale, ka sjellë frikën e shtuar për izolim. Ndonëse nga ana e mjëkëve është folur gjatë ditëve të fundit për disa skenarë, për të mos përfunduar në mbyllje, ende nuk dihet më konktretisht se cilat janë masat shtrënguese.
Shefi i Urgjencës Kombëtare, Skënder Brataj, ka thënë në një intervistë për A2 se këto nivele infektimi ishin të pritshme pas hapjes së shkollave: “Në këtë periudhë ishte normale që do të kishte rritje të rasteve për shkak të hapjes së shkollave, për arsye të ftohjes së motit dhe ndryshimit të kushteve ambientale. Këto janë në favor të virusit në këto momente”.
Brataj parashikon përkeqësim të situatës, dhe nevojën për aplikimin e masave të tjera shtrënguese. Ashtu si shumë vende europiane, edhe në Shqipëri shihet një rritje e shifrave të të infektuarve me Covid-19. Frika është shtuar pasi trendi i të infektuarve është në rritje.
“Gjendja dhe numrat do të rriten akoma, sepse infeksioni është përhapur shumë. Siç po vepron gjithë bota, edhe Shqipëria nuk ngelet mbrapa, po diskutohen të gjitha masat kufizuese që nuk çojnë në mbyllje të plotë. Nuk e dimë ende, nuk është vendosur për masa të tjera”, tha Brataj.
