Federata Shqiptare e Futbollit ka publikuar pamjet e fundit nga punimet e stadiumit të ri që po ndërtohet në kryeqytet ku dallohet se shkallët po marrin formën e duhur dhe në periudhën e verës të jenë të përfunduara. “Arena Kombëtare” po merr formë dita-ditës dhe faza aktuale e punimeve tregon se skeleti i stadiumi është drejt përfundimit, që do të thotë se së shpejti do të nisë puna për shkallët.
Ritmet e punimeve janë shumë të larta, ndaj gjatë gjithë verës synohet që të përfundojë gjithçka në lidhje me shkallët dhe ambientet e brendshme, për t’u përqendruar më pas te faza finale, përgatitja e fushës, që duhet të jetë e standardeve më të larta.
“Arena Kombëtare” është një nga kandidaturat zyrtare të UEFA-s për zhvillimin e finales së Superkupës së Europës 2020, ndërsa do të shërbejë jo vetëm për ndeshjet e skuadrës tonë Kombëtare, por edhe si një qendër multifunksionale për qytetarët, shërbime dhe argëtim gjatë gjithë ditëve të javës. Kapaciteti i këtij impianti do të jetë 22 mijë vende.
