Partia Socialiste ka nisur punimet për Kongresin elektoral. Fjalën hapëse e ka mbajtur sekretari i përgjithshëm, Taulant Balla, i cili ka deklaruar se ky është një moment reflektimi.
Nga salla e Pallatit të Kongreseve ai ka përcjellë një mesazh edhe për opozitën duke i bërë thirrje për dialog.
Ai tha se Kongresi sot ndez motorët për zgjedhjet e 30 qershorit. Balla nënvizoi se do të punojnë fort, për të fituar 61 bashkitë dhe se partia është e vetmja urë lidhëse mes qeverisë dhe bashkive.
“Ky Kongres i sotëm është i tillë, ne jemi partia më e madhe e gjithë shqiptarisë dhe po bëjmë punën që duhet. Ne jemi e vetmja forcë politike që qeveris me stabilitet dhe mund i qëndrojmë besnik angazhimeve të ndërmarra.
Sot ndezim motorët për zgjedhjet vendore të 30 qershorit. Ne duhet të jemi fitues edhe në bashkitë që kanë mbetur peng i kundërshtarëve tanë. Opozita u mundua për të sajuar një ngërç pas braktisjes së mandateve.
Kongresi i partisë ka qenë një moment reflektimi gjithmonë se çfarë kemi bërë, dhe se çfarë do të bëjmë. Partia duhet të rimodelojë strukturën dhe të vijojmë aksionin për rritjen e mëtejshme të anëtarësisë. Ne jemi të gatshëm për çdo lloj forme dialogu parlamentar në favor të vendit”, tha Balla.
