Avokati i njohur, Spartak Ngjela, thotë se ligji shqiptar nuk e lejon një person që është shpallur “non grata”, të futet në Parlament.
“Është rast i rrallë të shpallet non-grata një ish-kryeministër. Amerikanëve po nuk u jep rrezik për cënimin e sigurisë kombëtare, nuk e bëjnë këtë. Nga kjo kuptohet se ai ka shkelur rëndë, po se çfarë se dimë. Ata nuk flasin kot. Ky është një akt administrativ i dalë në Uashington”, tha ai në një intervistë në “ABC”.
Ai deklaroi se lideri historik i PD-së, duhej ta kishte çuar rastin në një gjykatë federale amerikane, dhe jo në Francë ku ai ka bërë padinë.
“Ne nuk dimë prova, por dimë që ata tërhiqen. Duke dalë “non grata”, nuk të lë ligji shqiptar të jesh në Parlament. Neni 2, pika 2 i ligjit për dekriminalizimin nuk ta lejon. Ligji shqiptar e ka”.
Berisha mund të jetë në Parlament të premten, por avokat Ngjela thotë se mbetet për t’u parë nëse mandati i tij do të certifikohet nga KQZ apo Komisioni i Mandateve.
“Të premten mund të jetë në Parlament ai. Kur të dalë KQZ dhe Komisioni i Mandateve do të shohim që e ndalon neni 2 pika 2 e ligjit, edhe Doshin me atë e hoqën”.
SHBA-të i kanë kërkuar Bashës që të largojë Sali Berishën nga partia dhe grupi parlamentar. Por ish-kryeministri nuk e ka lënë me kaq, ku në daljen e fundit mediatike e kërcënoi kryedemokratin nëse e përjashton nga partia, duke i kujtuar influencën që ka në PD.
Berisha e bëri mjaft të qartë, se nuk ka aspak në plan që të heq dorë nga mandati dhe më 10 shtator kur do të konstituohet Parlamenti i ri, ai do të jetë aty në sallën e Kuvendit.
Ai ka thënë shkurt dhe qartë se do të bëjë gjithçka që t’i rikthejë vlerat PD-së, që e ngriti vetë. Berisha nuk tha se cilat vepra do të kryente, por shtoi se do të bënte gjithçka që i lejonte kuadri kushtetues, ku nuk përjashtoi largimin e Lulzim Bashës dhe marrja e drejtimit nga ai vetë.
