Presidenti Ilir Meta e ka quajtur grabitjen e djeshme një ngjarje të përsëritur që cenon seriozisht sigurinë kombëtare, por edhe imazhin e vendit.
Në një deklaratë për shtyp, Meta u shpreh se kjo është një ngjarje e përsëritur, për të cilën ai ka ngritur më herët shqetësimin për mungesën e aksesit të ndërhyrjes së Policisë së Shtetit, në rast rreziku.
“Nisur nga ngjarja tronditëse e grabitjes së djeshme ndiej detyrimin dhe përgjegjësinë për këtë komunikim të drejtpërdrejt me ju dhe qytetarët. Përsëritja e kësaj ngjarje brenda një objekti të sigurisë së veçantë është e papranueshme. Si vend anëtar i NATO-s kemi detyrimin të garantojmë dhe standardet më të larta të sigurisë.
Si kryetar i Këshillit të Sigurisë Kombëtar më 16 maj të vitit 2018 kam organizuar mbledhjen e këtij këshilli me objekt gjendjen e sigurisë kombëtare.
Pika e tretë e axhendës së këtij takimi ishte pikërisht raporti për pikat strategjike portuale dhe aeroportuale të Republikës së Shqipërisë. Kam ngritur shqetësimin lidhur me mungesën e përgjegjësive të qarta që viheshin re mbi garantimin e sigurisë në aeroportin Nënë Tereza, mangësitë në akses dhe ndërhyrjen e Policisë së Shtetit në raste rreziku.
Si president e konsideroj ngjarjen e përsëritur brenda parametrit të sigurisë, cenim serioz të sigurisë kombëtare dhe të imazhit. U kërkoj agjencive ligjzbatuese të vijojnë punën për kapjen e autorëve, të kryhen hetime të plotë dhe të thella për zbardhjen e kësaj ngjarjeje.
Kjo ngjarje mund të kishte pasur pasoja edhe më të rënda dhe tragjike. Prokuroria të hetojë jo vetëm grabitjen e djeshme, por edhe për mosmarrjen e masave dhe nxjerrjen para përgjegjësisë të çdo institucioni që nuk ka kryer hetimet.
Presidenca vë në dispozicion të gjithë dokumentin e Këshillit të Sigurisë Kombëtare, në mbledhjen e kryer më 16 maj 2018. Faleminderit.”
