Sipas revistës “Forbes”, amerikani Jeff Bezos është sot njeriu më i pasur në botë. Themeluesi i kompanisë “Amazon”, ka një pasuri prej 131 miliardë dollarësh, që e bën njërin nga njerëzit më të pasur në historinë moderne. Është e vështirë të imagjinohet dikush tjetër, me më shumë para se sa Bezos.
E megjithatë, ai është larg nga të qenit njeriu më i pasur që ka ekzistuar ndonjëherë. Shumë kohë para internetit dhe tregtisë elektronike, njerëzit më të pasur në tokë ndërtuan perandoritë e tyre dhe i zgjeruan ato, duke përdorur ushtri të fuqishme, apo duke tregtuar ar. Të gjithë ata kishin diçka të përbashkët; pasuria e tyre kishte gjithmonë një lidhje me pushtetin. Ja cilët ishin ata:
- Henry Ford – 200 miliardë dollarë
Kur Henry Ford vdiq në vitin 1947, ai kishte ndërtuar një perandori, që kishte një vlerë prej 200 miliardë dollarësh me kursin e sotëm. Ai është themeluesi i “Ford Motor Company”, që prodhonte makinave me çmime të përballueshme nga shumica e amerikanëve. Modeli i tij revolucionar i biznesit, ishte një histori e vërtetë suksesi.
- Muammar Gaddafi – 200 miliardë dollarë
Diktatori libian, e krijoi atë pasuri gjigante, përmes vjedhjes së të ardhurave nga nafta e vendit. Gaddafi u vra nga forcat kryengritëse në tetorin e vitit 2011. Një pjesë e llogarive të tij bankare janë ende të ngrira. Por autoritetet besojnë se një sasi e konsiderueshme e pasurisë së tij, është e fshehur në shumë vende afrikane.
- Cornelius Vanderbilt – 215 miliardë dollarë
Kur vdiq në vitin 1877, ai ishte njeriu më i pasur në Shtetet e Bashkuara. Vanderbilt e vuri pasurinë e tij falë ndërtimit të hekurudhave dhe transportit. Në 1817, së bashku me një tjetër, Vanderbilt nisi të transportojë njerëz nga Nju Jorku drejt Nju Xhersit, dhe ky biznes shumë shpejt u shndërrua në një perandori.
- Osman Ali Khan – 230 miliardë dollarë
Në vitin 1937, revista “Time” shpalli Osman Ali Khanin si njeriun më të pasur në botë. Gjatë viteve 1911-1948, ai ishte sundimtar i pricipatave të Hiderabad dhe Berar, në Indinë e sotme. Ai kishte 400 milionë dollarë vetëm në bizhuteri.
- Cari i Rusisë Nikolai Romanov – 300 miliardë dollarë
Nikolai Alexandrovich, ishte emri më i rëndësishëm i dinastisë ruse Romanov. Sundimtari i fundit i Rusisë perandorake, sundoi vendin gjatë viteve 1894-1917. Mbretërimi i tij përfundoi me revolucionin bolshevik, kur u ekzekutua bashkë me familjen në vitin 1917.
- Andrew Carnegie – 310 miliardë dollarë
Ishte një miliarder i vetë-bërë. Prindërit e tij ikën nga Skocia në SHBA për një jetë më të mirë. Kur Carnegie ishte adoleshent, punonte në një fabrikë pambuku dhe fitonte 1.20 dollarë në javë. Më pas, u punësua si një lajmëtar në një kompani telegrafike, ku mësoi se si të përdorte pajisjet. Në atë kohë, ai mësoi shumë edhe mbi industrinë hekurudhore, dhe më vonë ngriti kompaninë e tij të përpunimit të çelikut. Përkundër gjithë pasurisë së tij, Carnegie bëri një jetë modeste, dhe e dhuroi për bamirësi një pjesë të pasurisë së tij.
- Perandori indian Akbar I – Zotëronte 25% të ekonomisë globale
Ai lindi shekullin XVI-të, dhe njihej si “më i madhi i perandorisë Mughal në Indi”. Gjatë mbretërimit të tij, perandoria Mughal përfaqësonte 25 për qind të ekonomisë globale. Ai investoi shumë mbi ushtrinë e tij, duke synuar zgjerimin e perandorisë. Megjithëse ishte musliman, ai respektonte fetë e ndryshme që ekzistonin në territorin e perandorisë së tij.
- Augustus Caesar – Zotëronte 30% të ekonomisë botërore
Kur Augustus Caesar sundoi perandorinë romake, kjo e fundit zotëronte mbi 30 për qind të ekonomisë botërore. Augusti kishte një pasuri të madhe personale, por pasuria e tij është e pamundur të llogaritet me saktësi. Disa ekspertë, pohojnë se ai sot do të kishte trilionë dollarë.
- Genghis Khan- E pamundur për t’u llogaritur
Genghis Khan, ishte udhëheqësi i Perandorisë Mongole gjatë shekullit XIII. Kur ishte 20 vjeç, ai ndërtoi një ushtri, duke synuar të shkatërronte fiset rivale në Azi. Genghis ishte i njohur për brutalitetin por edhe për taktikat e tij ushtarake. Kur vdiq në vitin 1227 në rrethana të paqarta, perandoria mongole ishte më e madhja që ka parë bota ndonjëherë.
- Mansa Musa – Mbi 400 miliardë dollarë
Sipas shumë historianëve, Mansa Musa, ka qenë njeriu më i pasur që ka ekzistuar ndonjëherë. Ai ishte sundimtari i Afrikës Perëndimore gjatë shekullit XIV. Pasuria e tij është e pamundur të llogaritet me saktësi. Edhe pse disa njerëz thonë se ajo ishte rreth 400 miliardë dollarë. Në atë kohë, mbretëria e tij, ishte prodhuesja më e madhe e arit në botë./ TIRANA TODAY
