Kryeministri Edi Rama ka shpërndarë një tjetër video në Facebook, ku një mjek amerikan flet për situatën e koronavirusit në New York.
Mjeku thotë se në vetëm një javë numri i rasteve është rritur ndjeshëm, teksa pacienti i parë është verifikuar vetëm më 1 mars.
Ai kritikon edhe qeverinë e cila është shprehur se do t’i heqin masat pas disa javësh, teksa thekson se ky është vetëm fillimi i përhapjes në New York.
“Nuk jam këtu për të folur për politikë por për pacientët dhe realiteti është se ajo çfarë pos shohim tani nëpër dhomat e spitaleve është shumë e rëndë. Javën e kaluar kur shkova në punë folëm për një ose dy pacientë, mes një dyzine të tjerësh që mund të kishin qenë prekur nga Covid-19.
Këtë javë dhe turnin tim të djeshëm, pothuajse çdo pacient për të cilin u kujdesa kishte koronavirus dhe shumë prej tyre ndodheshin në gjendje të rëndë”, thotë mjeku amerikan në video.
Ndërkohë Rama shkruan se New York-u rrezikon të përballet me një situatë të ngjashme si Italia.
Postimi i plotë:
NEW YORKU KËRTHIZA FINANCIARE E PLANETIT PO PËRBALLET ME MUNDËSINË E NJË TRAGJEDIE “ITALIANE”
*këtë video ta shohin sidomos ata që i quajnë të vonuara, përpjekjet tona të vazhdueshme për shtimin e kapaciteteve në vijën e zjarrit.
