Ambasadori i BE, Luigi Soreca, ka marrë pjesë në takimin e zhvilluar në ministrinë e Mbrojtjes, mbi mbrojtjen civile pas lëkundjeve të forta të tërmetit të një jave më parë.
Pas mbledhjes, Soreca dha një prononcim për mediat, ku u bëri sërish thirrje aktorëve politikë në vend, për të bashkëpunuar mbi reformën zgjedhore. Ambasadori komentoi gjithashtu edhe vendimin e Gjermanisë për hapjen e negociatave për Shqipërinë.
“Më lejoni të them fillimisht se jam shumë i kënaqur për këtë rezolutë kaq të rëndësishme që ka ndërmarrë Bundestagu. Bundestagu gjerman thjesht njohu ecurinë e mjaftueshme që kishte bërë Shqipëria, duke identifikuar po ashtu disa fusha që ishin identifikuar më parë në Shqipëri, kështu që nuk do flas për kushte të reja. Ajo që është kërkuar nga Bundestagu dhe në rast se miratohet edhe nga konferenca edhe nga këshilli i BE, është qe në atë periudhë ndërmjet këtij vendimi dhe konferencës së parë të bëhen dy gjëra, pra dy kushte. Më lejoni të them se është çelja zyrtare e negociatave që do ndodhë në këtë konferencë ndërqeveritare, këtë dua ta theksoj, çelja zyrtare e negociatave do bëhet në këtë konferencë”, tha Soreca.
Soreca kërkon nga aktorët politikë që të ulen dhe të zgjidhin problemet mes tyre, teksa theksoi se e vlerëson vendimin e kryetarit të opozitës, për t’u ulur në tryezën e thirrur nga OSBE për reformën zgjedhore.
“Dua të shpjegoj për procesin atë që ka të bëjë me angazhimin dhe përkushtimin e të gjithëve, për këtë çështje duhet përkushtim dhe angazhim i qeverisë, parlamentit, presidentit, shoqërisë civile, medias se pasi të çelen negociatat dhe kur të merret ky vendim në tetor nga këshilli i BE të gjitha këto palë duhet të bëhen bashkë në mënyrë që Shqipëria të ecë përpara. Sigurisht që unë dua shumë që të gjitha palët të ulen së bashku ajo që ka rëndësi, fakti që ne e kemi mirëpritur vendimin e udhëheqësit të opozitës për tu bërë pjese e tryezës së OSBE për reformën zgjedhore, ky është një hap i mirë, hap i parë, është e rëndësishme që të gjitha palët të kuptojnë që do duhet patjetër që të gjitha palët të bashkëpunojnë, se përgjegjësia është e përbashkët e të gjithëve. Duhet të ulen e të zgjidhen problemet, reforma zgjedhore është një prej tyre, kjo cështje ka të bëjë me të qenin bashkë”, u shpreh Soreca.
