Komisioni Europian publikoi një ditë më parë progres-raportin që rekomandon hapjen e negociatave për anëtarësim të Shqipërisë, ndërsa ditën e sotme një tjetër anëtar i BE-së i shtohet listës së shteteve skeptike.
Ministria e jashtme greke me anë të një deklarate të publikuar në faqen zyrtare të internetit shprehet, se dy vendet po punojnë për forcimin e marrëdhënieve, por thekson se, Tirana zyrtare duhet të garantojë respektimin e minoritetit grek.
Një pikë e fortë që ministria greke ka theksuar është moslejimi i kandidimit të kreut të OMONIA-s Fredi Bejleri për Bashkinë e Himarës në zgjedhjet e ardhshme vendore.
“Greqia është duke punuar për të përmirësuar marrëdhëniet dypalëshe me Shqipërinë dhe mbështet procedurën për anëtarësimin në Bashkimin Europian, në kushtet që janë zbatuar për të gjitha vendet e anëtarësuara, duke përmbushur të gjitha kërkesat.
Siç është bërë e qartë në raportin e Komisionit Europian, respektimi i të drejtave të minoritetit grek është i lidhur drejtpërdrejt me perspektivën europiane të Shqipërisë dhe është pjesë integrale e pesë prioriteteve kryesore për hapjen e negociatave të vendit për anëtarësim në BE, përmbushja e të cilave do të trajtohet nga Këshilli i Europës.
Në këtë kontekst, ne presim garanci për të drejtat e minoritetit në të gjithë Shqipërinë, një masë që Shqipëria kishte ndërmarrë për ta miratuar deri në Maj 2018, dhe zbatimin e ligjit të pronësisë për anëtarët e minoritetit. “Së fundmi, po vëmë re metoda që synojnë të anulojnë kandidaturën e kreut të OMONIA-s Fredi Bejleri për Bashkinë e Himarës në zgjedhjet e ardhshme vendore.
Këto veprime shkelin të drejtën e përfaqësimit politik të minoritetit grek për zgjedhjet në Himarë. I bëjmë thirrje Shqipërisë që të kthehet në rrugën e përparimit dhe jo të bëjë prapa, në mënyrë që procesi i saj i pranimit të përparojë”, thuhet në deklaratën e ministrisë së jashtme greke.
