Presidenti Ilir Meta insiston që partitë politike të futen në zgjedhjet e 13 tetorit.
Gjatë një konference për shtyp, Meta u shpreh se nëse Rama pranon që në 13 tetor të zhvillohen 3 palë zgjedhje, është i gatshëm që të lë detyrën e presidentit dhe të dalë në fushatë. Ndërsa shtoi se kishte vetëm një kusht, duke propozuar që në vend të tij të ulet Rexhep Meidani.
“E ftoj kryeministrin Rama që të reflektojë, të mos pengojë zbatimin e dekretit për 13 Tetorin, ftoj KQZ-në të mos vijojë me paligjshmëri, ftoj partitë që duan, dhe jo ato që nuk duan të marrin pjesë në zgjedhje.
Nëse kërkon kryeministri jam i hapur të lë detyrën e Presidentit duke konkurruar në 13 tetor, por vetëm me një kusht që në këtë zyrë të vijë një njeri me integritet, që ka qenë në këtë zyrë dhe ka provuar se mbrojtja e interesit kombëtar është mbi çdo gjë tjetër, psh si profesor Meidani.
Është një njeri që ato dy tre çështje do i mbronte edhe më mirë se unë. Kështu që mos bëjmë sikur nuk e shohim thellimin e krizës“, deklaroi Meta.
