Rreth 50 vjet më parë, fshati Marotikal në rajonin e Keralas në Indi, ishte si të gjithë fshatrat e tjerë. Banorët e tij meshkuj, ishin të varur nga alkooli dhe nga kumari. Gjatë asaj kohe, një nga fshatarët, Unikrishnan, zhvilloi një pasion për shahun gjatë kohës që jetoi në një qytet aty pranë.
Kur u kthye në fshatin e tij, ai hapi një dyqan çaji, dhe filloi t’u mësojë klientëve se si të luajnë shah. Popullariteti i lojës nisi të rritet, dhe së shpejti gati të gjithë në fshat, u bënë gati të varur nga loja e shahut. Përballë kësaj varësie të re, ata hoqën nga pija dhe bixhozi. Tashmë Marotikal njihet si “fshati i shahut”.
“Shahu na ndihmon të kapërcejmë vështirësitë dhe vuajtjet”- thotë Unnikrishnan, që thekson se 4.000 nga 6.000 banorët e këtij fshati, luajnë thuajse çdo ditë shah. Shahu besohet se e ka origjinën në Indi në shekullin VI-të. Edhe pse sot mjeshtërit më të mëdhenj, ndodhen kryesisht në Rusi.
Ekspertët vlerësojnë se shahu është një nga sportet më të dobishme për njeriun. Ai përmirëson përqendrimin, ndërton karakterin e njeriut dhe krijon komunitete sociale të shëndetshme./ TIRANA TODAY
