Kreu i Partisë Demokratike, Lulzim Basha ka folur nga Berlini për Deutsche Welle-n ku ka treguar arsyen e vizitës së tij. Basha tha se takimet kanë për qëllim diskutimin e krizës politike dhe bashkëpunimin me partnerët në Gjermani për tejkalimin e kësaj krize, por edhe për të ardhmen e Shqipërisë.
Kryedemokrati theksoi se dalja nga parlamenti është pa kthim pas, ndërsa u shpreh se ndihet i inkurajuar pasi në Bundestag gjeti “mbështetje për këtë agjende transformuese”, që është largimi i qeverisë së krimit dhe sigurimi i një sistemi demokratik.
Çfarë tha Basha:
Takimet që janë organizuar nga mikpritësit e mi në Bundestag, kanë për qëllim diskutimin e krizës politike në Shqipëri dhe bashkëpunimin me partnerët në Gjermani për tejkalimin e kësaj krize, shumë i rëndësishëm jo vetëm për demokracinë dhe stabilitetin e Shqipërisë, por edhe për të ardhmen e saj. Në Europë nuk shkohet me gënjeshtra, nuk shkohet me hilera, me një shtet të kapur nga krimi.
Themeli i demokracisë është vota, dosja 339 tregon se në zgjedhjet e 2017 krimi i organizuar në bashkëpunim me kupolën e rilindjes kanë asgjësuar vullnetin e shqiptarëve. Parlamenti nuk është produkt i votës së lirë të qytetarëve, po i bashkëpunimit me krimin që ka sjellë një braktisje totale, një tradhtim të interesit publik dhe të interesit të qytetarëve shqiptarë nga një qeveri që e ka lidhur fatin e vet me krimin e organizuar.
A do ktheheni prapë në parlament?
Largimi ndodhi pas shterimit të çdo mundësie për të zgjidhur në mënyrë institucionale këtë krizë të thellë legjitimiteti. Partnerët gjermanë i njohin këto shqetësime, i kanë ngritur para 1 vit. Tashmë ato janë përkeqësuar. Ne kemi prova tanimë të bashkëpunim të krimit të organizuar me qeverisjen.
Dalja e opozitës nga parlamenti është një dalje pa kthim, kriza politike është reale, por është një mundësi e madhe jo thjesht për të larguar qeverinë, por për t’i dhënë Shqipërisë një sistem demokratik funksional që iu shërben atyre dhe jo partive apo thjesht klasës politike.
Ky transformim do të ketë mbështetje nga të gjithë shqiptarët e ndershëm. Jam shumë i inkurajuar që këtu në Bundestag kemi gjetur mbështetje për këtë agjende transformuese. Në duam vlerat e vërteta evropiane.
