Kreu i Shtetit ka rrëfyer në emisionin ‘5 Pyetjet nga Babaramo’, se cilat janë objektivat e tij për protestën e 2 marsit. Ai tha se në datën 2 mars do i drejtohet popullit dhe ndërkombëtarëve, duke u bërë të qartë se mbi Kushtetutën qëndron vetëm sovrani i tij. Presidenti sqaroi se misioni i tij është për t’ia bërë të qartë popullit, se instalimi i grushtit të shtetit asgjëson liritë dhe demokracinë.
“Në 2 mars do u drejtohem qytetarëve si në dhjetor, kur u shty. Në 2 mars unë do i drejtohem popullit dhe ndërkombëtarëve, duke u bërë të qartë se mbi Kushtetutën qëndron vetëm sovrani i tij. Fjalën do ta ketë populli. Vetëm me flamurin kuqezi për të vendosur sistemin demokrat.
Qytetarët janë ftuar në bulevard në orën 17:00, parullat janë të qartë ‘Jo grushtit të shtetit’ dhe ‘Jo shpopullimit’. Objektivat e mia janë të qarta, të ndërgjegjësoj qytetarët për grushtin e shtetit, t’u bëj të qartë se instalimi i grushtit të shtetit asgjëson liritë dhe demokracinë.
Si mund të garantojë Gjykata Kushtetuese e zgjedhur në mënyrë mafioze dhe përmes këtyre falsifikimeve, se do të ketë garanci për pronat e tyre? Nuk ka asnjë arsye që të ketë asnjë akte dhune.
Nëse segmente të qeverisë dhe bandave të tyre do të provokojnë, përgjegjësia do të jetë e tyre. Populli do të bëjë një manifestim historik në mbrojtje të Kushtetutës, dhe kush janë puçistët që duan të përdhunojnë përfundimisht edhe reformën në drejtësi për të instaluar ‘Rama-formën’. Gjykata Kushtetuese është vija e kuqe dhe e kuqe flakë”, tha ai.
