Gjatë mesditës së sotme, kryeministri Rama vizitoi Lezhën, nga ku pa nga afër situatën ku ndodhet qyteti nga përmbytjet.
Kryebashkiaku i Lezhës, Pjerin Ndreu dhe Rama kanë parë nga afër një pikë kritike, ku nga reshjet ka rrëshqitje masive dheu, duke rrezikuar disa banesa.
Ndreu u shpreh se deri më tani, 40 familje janë evakuar dhe nëse shiu vijon, do të duhet ndërhyrje urgjente.
Duke qëndruar në të njëjtën linjë, ai shtoi se kanë ardhur ekspertët nga Tirana. Dhe se kërkohet ndërhyrje urgjente, pasi situata mund të agravojë. Teksa Ndreu shprehej i shqetësuar për përmbytjet, nga ana tjetër kreu i qeverisë tha se Lezha e ka mbajtur shumë mirë situatën.
Pjesë nga biseda:
Pjerin Ndreu: Procesi është i rrezikshëm, nëse vazhdojnë reshjet, ka problematikë për banorët. Paraprakisht janë marrë të gjitha masat, kanë ardhur dhe ekspertë nga Tirana. Këtu kërkohet ndërhyrje urgjente, sepse situata mund të agravojë.
Rama: Kanë ndërtuar pa leje.
Ndreu: Të gjithë pa leje kanë ndërtuar këtu, sepse nuk lejohej. Por, në fakt, duhet me ndërhy. Kjo zonë nuk ka qenë e lejueshme për të ndërtuar. Nuk është hera e parë që ndodh kjo.
Rama: Përtej këtyre detajeve, Lezha e ka mbajtur shumë mirë situatën.
Ndreu: Lezha e ka mbajtur shumë mirë, përvec zonës së Zadrimës, që mban edhe zonat e tjera dhe ka marrë ngarkesë. Kemi bërë një punë të madhe, që nuk na ka çuar në katastrofë. Kemi ndërhyrë me mbi 50 kamionë në argjinaturë, në dy pika shumë të rrezikshme, dhe e izoluam. Reshjet ranë pak, por prapë situata atje është problematike. Kemi evakuuar mbi 40 familje.
Rama: Po mos kishim bërë atë punën, do ishin mijëra familje siç ndodhi në atë përmbytjen e 2010 që mbrëmë pash të gjitha të dhënat. Fola dhe pash që niveli i reshjeve është më i madh dhe dy herë më i madh se ai i 2010.
Në këtë aspekt është me rëndësi që kur vjen një intensitet i tillë, as një vend nuk ka çfarë i bën as Gjermania e as Parisi, por testi është sa shpejt tërhiqet uji.
Ndreu: Është bërë një punë shumë serioze që ka mbajtur ujin që nuk ka dalë nga Drini. Qyteti është mbajtur në intensitet të mirë.
Rama: Këtu dikur ishte hata.
