Kryeministri Edi Rama ka dhënë një prononcim për mediat nga Londra ku ndodhet për Samitin e NATO-s.
Kreu i qeverisë u shpreh se e ka shfrytëzuar këtë samit për të kërkuar ndihmë konkrete për vendin, pas situatës së krijuar nga tërmeti.
Rama tha se ka diskutuar me disa prej liderave më të mëdhenj dhe se qëllimi është organizmi i një konference të madhe donatorësh.
“Për mua ky ishte objektivi kryesor i gjithë këtij samiti dhe u ndjeva i inkurajuar nga fakti që të gjithë ishin jo vetëm në dijeni por edhe të interesuar të dinin më shumë.
Bëra bisedë të gjatë me presidentin e Francës, kancelaren, kryeministrin e Hollandës dhe sërë liderësh të tjerë, kryeministrja e Danimarkës ka qenë jashtëzakonisht e përfshire dhe e interesuar, kryeministri Conte, i Kanadasë, Erdogan, me presidentin Trump kemi folur, qëllimi është të organizojmë një konference të madhe donatorësh. Reagimet e para kanë pozitive por do punojmë intensivisht”, tha ai.
I pyetur nëse ka folur edhe mbi cështjen e integrimit të Shqipërisë në BE, Rama tha se kjo temë ka qenë në fokus.
“Fokusi ka qenë në këtë temë, ka pasur edhe elementë të tjerë në bisedë për ecurinë e procesit të brendshëm në BE, si do shkojë diskutimi mbi dokumentin e paraqitur nga Franca për ndryshim të metodologjisë, por kam qenë i fokusuar tek kjo çështje, por vendi do vazhdojë të bëjë të njëjtat gjëra edhe sikur të ishin hapur negociatat. Përtej dallimeve e kundërshtive në procesin e negociatave Evropa është e bashkuar në mbështetje të shqiptarëve. Ju kemi vënë në dispozicion dokumente, informacioni në Bruksel ka arritur, se kemi parë shumë ndihmë”, deklaroi ai.
Kreu qeveritar foli edhe rreth thirrjes për bashkëpunim ndaj kryetarit të PD-së, Lulzim Basha.
“Gjene me normale ne bote, s’ka asnjë sens qe të vazhdoje historia me deklarata ne distancë kur ne të gjithë jemi jo vetëm të goditur nga e njëjta tragjedi por nga ana tjetër të gjithë jemi në nevojë për të ndërtuar çatinë e një shtëpie më të madhe se shtëpia e politikës, që është shtëpia e Shqipërisë”, përfundoi Rama.
