Gordon Banks, portieri i Anglisë në Kupën e Botës 1966, ka ndërruar jetë në moshën 81 vjeçare. Familjarët e tij në një deklaratë të lëshuar përmes ish-skuadrës së tij të dikurshëm, Stoke City thanë: “Me trishtim të madh ju njoftojmë se Gordoni vdiq gjatë natës. Jemi të shkatërruar për humbjen e tij, por kemi shumë kujtime të bukura dhe jemi shumë krenarë për të.”
Në një nga intervistat e tij të fundit, Banks tha për “The Telegraph” se edhe pse momentet e tij më të bukura ishin me fanellën e Anglisë, FA nuk bëri “asgjë” për të.
I konsideruar gjerësisht si portieri më i mirë në Angli, Banks luajti në finalen e Kupës së Botës në Wembley në vitin 1966 dhe e fituan trofeun duke mposhtur Gjermaninë Perëndimore.
Katër vjet më vonë në Kupën e Botës 1970 në Meksikë, Banks ishte fantastik përballë Brazilit, dhe arriti të ndalte një super yll si Pele, por gjithsesi i vetëm nuk mundi të shmangte eliminimin.
