Futboll

Ardian Ismajli drejt gjigantit ukrainas, sezonin tjetër në Champions League

               Publikuar në : 16:44 - 12/02/19 Enno

Dy ditë më parë, Ardian Ismajli, do të linte gjurmën e tij në një ndeshje të madhe si ajo mes Hajduk Splitit dhe Lokomotivës së Zagrebit. Falë golit të tij dhe asist të një tjetër shqiptari, Francesco Tahiraj, Hajduku fitoi ndaj Lokomotivës ku luan aktualisht, futbollisti tjetër i kombëtares, Myrto Uzuni.

Ai gol i shënuar ndaj Lokomotivës, mund të jetë më i rëndësishmi në karrierën e qendërmbrojtësit të kombëtares shqiptare. Teksa ai bënte paraqitje dinjitoze në fushën e lojës, në tribunën VIP të “Plodjud”, ishin disa skaut, të cilët kanë pasur një mision të posaçëm.

“Slobodnadalmacija.hr”, raporton këtë të martë, se në stadiumin e Hajdukut të dielën pasdite, ishin dhe disa vëzhgues, të cilët kanë pasur një qëllim, të ndiqnin lojën e Ardian Ismajlit.

Mësohet se personat kanë ardhur nga Ukraina për llogari të Shakhtar Donetsk, klubit gjigant ukrainas që duket se ka vendosur në radarë qendërmbrojtësin e kombëtares shqiptare. Kështu, sipas sajtit të sipërpërmendur, Ismajli, nëse vijon me paraqitje të mira gjatë pjesës tjetër të sezonit, mund të marrë një ofertë nga Shakhtar Donetsk në verë.

Shakhtar, e ka pasur në vëzhgim mbrojtësin e kombëtares shqiptare gjatë kohës që klubi i Hajdukut ishte në Antalia për përgatitjet dimërore. Këtu, të dy ekipet, Hajduk dhe Shakhtar, zhvilluan dhe një takim miqësor mes tyre, teksa duket se pikërisht paraqitja e qendërmbrojtësit kuqezi u ka lënë mbresa.

Gjithashtu interesim për mbrojtësin e Shqipërisë ka edhe nga Seria A dhe Bundesliga, por emrat nuk do të jepen deri në momentin që do të mbyllet gjithçka në lidhje me Shakhtar Donjesk. Mbetet të shohim se çfarë do të ndodhë me Ardian Ismajlin, ndërsa merkato e dimrit në Kroaci mbyllet në 15 shkurt 23:59, pra nuk përjashtohet edhe një surprizë e madhe brenda këtyre ditëve.

Kthehu
WhatsApp Denonco ne TT