Në moshën 79-vjeçare është ndarë nga jeta ish-deputeti demokrat, Abedin Elmazi. Ai ka qenë deputet i Partisë Demokratike në dy legjislatura, si përfaqësues i Vlorës.
“Abedin Elmazi ishte luftëtar i të drejtave të njeriut dhe themelues i Partisë Demokratike të qytetit bregdetar. Breza të tërë nxënësish mësuan prej profesor Abedinit jo vetëm matematikën, pasionin e tij të madh të rinisë, por edhe etikën, respektin për të vërtetën si dhe qëndresën përballë mekanizmave që përpiqeshin ta zvetënonin njeriun dhe ta shndërronin në një robot të diktaturës”, shkruan Lulzim Basha.
I lindur në Filat të Çamërisë, më 1 maj 1940, ai ishte njëri nga figurat më të spikatura të filialit të Fakultetit Ekonomik e në Vlorë, derisa diktatura e mbylli në 1982-in.
Doktori i Shkencave Abedin Elmazi dha kontribut thelbësor në rigjallërimin e jetës universitare në qytetin bregdetar, pa e ndërprerë angazhimin e tij në fushën e të drejtave të njeriut.
