Elseid Hysaj ka deklaruar se kërkon një destinacion të ri nga Napoli dhe menaxheri i tij e përforcoi duke thënë se do të punojë deri në ditën e fundit të merkatos për të gjetur një skuadër. E teksa për një muaj zgjatën bisedimet me skuadrën e Atletikos dhe nuk u konkretizuan, duket se i njëjti problem si me spanjollët po shfaqet së fundmi edhe me interesimin nga Juventus.
Në Itali bëjnë me dije se trajneri Sarri ka dhënë dakordësinë që drejtori Paratiçi të negociojë me Napolin për Hysajn, të cilin e sheh si pasues të mundshëm të Kanselos që mund të transferohet te Siti. Mirëpo, në Itali shtojnë se kërkesa tepër e lartë e Napolit që e vlerëson të paktën 25 milionë € kartonin e mbrojtësit të Kombëtares shqiptare, ka bërë që Juventus, por edhe Roma të stepen. Deri më tani, shanset që të paguhet kjo shifër janë shumë të vogla, por mbetet për t’u parë deri në fund të merkatos.
