Naftëtarët e Ballshit do marrin për dy vite rresht pagë nga buxheti i shtetit. Lajmi është bërë i ditur nga Ministrja e Infrastrukturës, Belinda Balluku.
“Naftëtarët e Ballshit gjatë vitit 2022-2023 do të paguhen 30 mijë lekë në muaj”, tha ministrja sot në Komisionin për Veprimtaritë Prodhuese, Tregtinë dhe Mjedisin.
Në muajin tetor, naftëtarët e Ballshit dolën në protestë, ku kërkuan zgjidhje për rrogat.
Për 11 muaj, 850 naftëtarët e Ballshit kanë marrë rrogën në bazë të një marrëveshje me qeverinë, por në nëntor kjo marrëveshje skadon.
Ndodhur në këto kushte, naftëtarët u mblodhën pranë uzinës së naftës, duke kërkuar që rafineria të rikthehet në punë. Por duket se një zgjidhje ka ardhur për ta, ku tashmë për dy vite rresht do të marrin pagë nga buxheti i shtetit.
