Ish-lojtari i Juventusit, Klaudio Markizio, ka folur për tmerrin e përjetuar disa ditë më parë, ku disa persona tentuan t’i grabisnin shtëpinë.
Në një intervistë për “Corriere della Sera”, Markizio tha se pavarësisht se ai dhe gruaja e tij e kishin pistoletën te koka, ata ia dolën të qëndronin të qetë. Sipas futbollistit, ishin pesë burra që hynë në shtëpinë e tij, duke pyetur se ku i mbanin gjërat me vlerë.
“Ata na vendosën pistoletat në kokë. Unë nuk kisha parë asnjëherë në jetën time armë të vërtetë. Për fat të mirë ia dolëm të ishim të ftohtë. Ishin pesë burra që hynë në shtëpinë tonë. Ata më pyetën se ku i kishim fshehur gjërat me vlerë. Unë iu thashë atyre se nuk kemi një vend ku i mbajmë, megjithatë ata nuk më besuan. Morën gjithçka gjetën dhe u larguan menjëherë. Isha shumë i frikësuar, si për veten ashtu edhe për bashkëshorten. Për fat të mirë, në ato momente fëmijët nuk ishin në shtëpi. Kishin shkuar të luanin futboll, dhe nuk ishin kthyer ende. Ishim të frikësuar, por fatmirësisht mbetëm të qetë edhe kur na kërcënuan me pistoletë në kokë”, tha Markizio
