Kreu i opozitës, Lulzim Basha ka reaguar në lidhje me padinë që kryeministri Edi Rama ka ngritur ndaj Ramush Haradinajt.
Përmes një postimi në Facebook, Basha e cilëson këtë veprim si një ‘perversitet të shëmtuar anti-kombëtar”. Ai shton se ky veprim i kreu të qeverisë është një akt i ulët që turpëron të gjithë shqiptarët.
“Pseudo-padia e Edi Ramës ndaj kryeministrit të Kosovës është një perversitet i shëmtuar anti-kombëtar. Është turp i pakapërdishëm që Ramush Haradinaj, pas gjakut të tij dhe familjes së tij për çlirimin e Kosovës, pas betejave me akuzat e montuara të Beogradit, të përballet me pasojat e degjenerimit dhe vasalitetit të Edi Ramës. Ky akt i ulët që na turpëron të gjithëve meriton refuzimin dhe revoltën legjitime ndaj një kryeministri të dështuar fund e krye dhe ndaj falimentimit të tij politik dhe moral para Shqipërisë dhe mbarë kombit shqiptar”, shkruan ai në postimin e tij.
Kujtojmë se Rama depozitoi në Gjykatën Themelore në Prishtinë një padi prej 30 faqesh për kryeministrin në detyrë të Kosovës Ramush Haradinaj. Kreu i qeverisë e akuzon atë për shpifje në lidhje me disa deklarata që ai ka bërë për çështjen e shkëmbimit të territoreve.
