Spektakli i të shtunës mbrëma në TV Klan, “Klanifornia”, ka disa muaj që vjen në skenë pa aktoren Lisa Kujofsa. Më saktë që nga muaji shtator, Lisa e ka bërë të ditur largimin e saj në rrjetet e saj sociale, duke falenderuar publikun dhe kolegët e saj për mbështetjen që i kanë dhënë.
Ndërkohë gjatë një lidhje me “skype” për “Abc e Mëngjesit”, Lisa tregoi se spektakli nuk kishte të bënte me largimin e saj, por që arsyeja kryesore ishte mungesa e publikut për shkak të kufizimeve prej Covid-19 dhe pasojave të tjera të ardhura prej pandemisë.
“Mua më merr malli për publikun. Klanifornia fatkeqësisht si të gjitha spektaklet me publik nuk ka më publik, që këtu fillon një mangësi, një ftohtësi. Shfaqjet që janë me publik dhe duan reagimin e menjëhershëm, është vrastare, është shumë e vështirë. Unë për vete për shembull e ndjej shumë të vështirë, po nuk pata reagimin e bluaj në mëndje gjatë gjithë kohës dhe them me vete ‘o bo bo, ç’po bëj unë këtu, ç’dua unë këtu’.
Kjo mund të jetë një nga arsyet. Arsyeja kryesore ishte që doja të isha në shtëpinë time dhe doja të isha larg një papërgjegjshmërie masive shqiptare përkundrejt situatës në të cilën ndodhemi. Nuk kam as turp dhe as frikë ta them. Më vjen keq që shoh të tilla situata. Ti mund të më besosh ose jo, që kur ka ardhur viti i ri, unë kam ardhur vetëm një ditë jashtë se më duhet të bëja pazar se duhej ndonjë frut në shtëpi. Unë nuk kam dal sepse kam një lloj përgjegjshmërie, siç bëjnë të gjithë të tjerët që më rrethojnë”, ishin fjalët e aktores për largimin e saj.
Lisa tashmë ka nisur jetesën në Itali, dhe ka zgjedhur të jetë afër publikut me disa video që i realizon vetë dhe më pas i publikon në “Youtube”.
