Ish-kryeparlamentarja Jozefina Topalli, ka ironizuar intervistën që dha kryedemokrati Basha në emisionin “Open”. “Mr. Drynit i dolën sytë jashtë nga halli!”, shkruan me ironi Topalli, teksa i referohet ndërrimit të bravave që u bënë në disa prej zyrave të selisë së PD-së në rrethe.
Mbështetësit e Sali Berishës akuzuan ata të Bashës, se u kanë ndryshuar bravat dyerve të selive, me qëllim që të mos i lejojnë të bëjnë referendumin e 18 dhjetorit për shkarkimin e kryedemokratit.
Kreu demokrat, Lulzim Basha, i ka kërkuar ish-kryeministrit Sali Berisha që të shkojë të përballet me drejtësinë për akuzat e amerikanëve. “Zoti Berisha thotë i jam drejtuar gjykatës franceze dhe le të dorëzojnë një provë. Por zoti Berisha është gati t’i drejtohet drejtësisë shqiptare? Po apo jo, meqë ai kërkon prova”, tha Basha në emisionin “Open”. Më tej ai ka deklaruar se Berisha po ju bën presion demokratëve, që të bojkotojnë Kuvendin e 18 dhjetorit. Sipas tij, ai tentoi që të bllokonte edhe mbledhjen e Këshillit Kombëtar ku ju dërgonte mesazhe anëtarëve, që të mos votonin shkarkimin e anëtarëve të Kryesisë. “Ne jemi shumica, pse Berisha i çon mesazh personal delegatëve apo anëtarëve të Këshillit mos shkoni në Këshill Kombëtar, dhe shumica erdhi dhe votoi të dielën në darkë. Tani një njeri që ka shumicën, s‘ka pse frikësohet. Pse do u thotë shkruajini besëprerë në formular. Edi Ramës i intereson tubi i oksigjenit që është Sali Berisha”, deklaroi Basha.
